Shin Gwamnatin Tarayya Na Bada Tallafin N30,000 a Zango Na Biyu Na Bullar Cutar Korona?

Gaskiyar Magana: Karya Ne

Tushen Magana:

A ranar Alhamis, 18 ga watan Maris din shekara ta 2021, masu tantance sahihancin labarai dan gano sahihancin sun a Cibiyar Bunkasa Demokaradiyya da Cigaba (CDD) sun gano wani da ake yadawa ta manhajar WhatsApp. Labarin na cewa yanzu haka gwamnatin tarayya na bada tallafin N30,000 ga jama’a a matsayin tallafi rage radadin da cutar Korona ta haifar a wannan zagaye na biyu da cutar ke kunno kai.

A cewar labarin, za a rika baiwa yan Najeriya naira dubu talatin kowane sati dan cigaba da rayuwa acikin wannan zango na biyu na cutar ta Korona.

Wani bangare na labarin yace: “ku gaggauta dan samun tallafin cigaba da rayuwa na N30,000. Acikin dakiku kadan za ku cika fom din neman wannan tallafi. Ku hanzarta kada ku rasa wannan dama”. An samar da wani adireshin yanar gizo da aka ce shine za a latsa dan cika fom din.

Gaskiyar Al’amari:

Binciken da masu bin diddigin labarai dan gano sahihancin sun a CDD suka gudanar ya gano cewa ikirarin da labarin yayi cewa gwamnatin tarayya na bada tallafin naira dubu talatin duk sati ga jama’a karya ne.

Binciken har wayau ya gano cewa adireshin yanar gizon da aka bayar acikin labarin adireshi ne na bogi da ke yiwa tarko. Yan damfara ne suka tsara labarin dan zambatan jama’a. idan mutum ya latsa adireshin zai yadda aka wallafa wasu hotuna da nufin daukar hankali da kokarin gaskatawa mutane batun tallafin wadda kuma karya ne.

Bayan kusan kamala bada bayanai acikin shafin, za a bukaci mutum ya dakata ya sanar da akalla wasu mutanen goma kafin ya cigaba, wannan kuma wata alama ce day an damfara ke amfani da ita yaudarar jama’a.

Karin binciken na CDD ya gano cewa, sahihiyar majiyar da ke bada bayanai kan tallafin gwamnatin tarayya kan cutar Korona a karo na biyu itace survivalfund.gov.ng, a wannan shafi ne kadai mutane za su samu gamsassun bayani kan tallafin rage radadin cutar Korona a zagaye na biyu.

Kammalawa:

Wani labari da sako da ake yadawa ta manhajar WhatsApp da ke ikirarin cewa gwamnatin tarayya na bada tallafin naira dubu talatin duk sati ga yan Najeriya a matsayin daukin zagayen cutar Korona karo na biyu karya ne.

Adireshin yanar gizon da aka samar ajikin sakon adireshi ne na bogi kuma yan damfara ne suka samar dashi dan zambatan jama’a.

CDD na kira ga jama’a da suyi watsi da labarin tare da daina yadashi.

Kuna iya aikowa CDD labaran da kuke da shakku akansu da gano muku gaskiyar su. Za ku iya turo gajeren sako (SMS) ta manhajar WhastApp akan lamba: +2349062910568 ko ku tuntube mu a shafin Twitter a @CDDWestAfrica.

#AgujiYadaLabaranBogi

Center for Democracy and Development West Africa| CDD West Africa